ഒന്നാമത്

സുവോളജി ലാബില്‍
അവളായിരുന്നു
ഒന്നാമത് .
എന്റെ ഹൃദയം
പലതവണ
കീറിമുറിച്ച
അവള്‍ക്ക്
മണ്ഡൂക ഹൃദയം
കണ്ടാല്‍
കൈ വിറക്കില്ലല്ലോ.

ബെസ്റ്റ് ഫ്രെണ്ട്

പരിഭ്രമത്തോടെയാണ്
അവന്‍
അതെന്നെ കാണിച്ചത് .
മൂന്ന് ഇഞ്ച്‌ ടച്ച് സ്ക്രീനില്‍
ഒളിക്കാമറ വിഴുങ്ങിയ,
എന്റെ പ്രിയ കൂട്ടുകാരിയുടെ
നഗ്നത.
ഒരു നിമിഷത്തെ
ഞെട്ടലില്‍ നിന്നും
പുറത്തു കടന്നു ഞാന്‍
പൊടുന്നന്നെ ബ്ലു ടൂത്ത്
ഓണ്‍ ആക്കി .

ബാലപാഠം

ഓണപ്പരീക്ഷയ്ക്ക് ,
വീട് കാക്കുന്ന മൃഗം
അച്ഛന്‍ എന്നെഴുതിയ
എന്റെ നിഷ്കളങ്കത
പരിഹസിക്കപെട്ടു .
മുരളി സാറും
ജലജ ടീച്ചറും
അതൊരാഘോഷമാക്കി.

പരിസരത്തെങ്ങും
ഒരു നായയില്ലാതിരുന്നിട്ടും ,
ഞങ്ങളുടെ വീടുകള്‍
സംരക്ഷിക്കപെടുന്നതിലെ
യുക്തി അവര്‍ക്കെന്തേ
മനസ്സിലാകുന്നില്ല .

ഉച്ചക്ക് ,
മൂത്രപ്പുരയുടെ
മതിലില്‍
മുരളി സാര്‍ + ജലജ ടീച്ചര്‍
എന്ന് ഉരുട്ടി വരച്ചപ്പോഴാണ്
മനസ്സൊന്നു തണുത്തത്‌ .

ഇര

കരുതലിന്റെ
ലേപനം പുരട്ടി
നിര നിരയായി
നീങ്ങുന്ന ഉറുമ്പുകളില്‍
ചിലതിനു
വഴി തെറ്റാറുണ്ട്.
സൂക്ഷിക്കണം,
ചതിയുടെ മരണക്കിണര്‍
തീര്‍ത്ത് കുഴിയാനകള്‍
കാത്തിരിപ്പുണ്ട് .

മോര്‍ച്ചറി

മഞ്ഞ മതില്‍ക്കെട്ടിനുള്ളില്‍
കാട് പിടിച്ച മൂലയ്ക്ക്
എനിക്കും കിട്ടി
ഒരു വീട് .

ഇനി ആരാണാവോ
വെള്ള പുതച്ച്‌
എന്നെ
കുടിയിറക്കാന്‍ വരുന്നത്.

കാക്ക

വിരുന്നു വിളിക്കണം
ബലിയുണ്ണണം
നാടായ നാടെല്ലാം
കൊത്തി വെളുപ്പിക്കണം.

എന്നിട്ടും,
തീണ്ടാപാടകലെത്തന്നെ
പറവകളിലെ
ദളിത ചിഹ്നം.

യാത്രാമൊഴി

നമുക്ക് പിരിയാം
ഒരിക്കലും
കാണാതിരിക്കാന്‍
ഓര്‍ക്കാതിരിക്കാന്‍ .
വീണ്ടും കണ്ടുമുട്ടിയാല്‍
മുഖം തിരിക്കാം
പരസ്പരം
മരിച്ചതായ് കരുതാം.
ഓര്‍മ്മ ദിവസത്തില്‍
വീണ്ടും വീണ്ടും
മറക്കാം.
ഒടുവില്‍ ,
ഇതിനൊന്നും
കഴിഞ്ഞില്ലങ്കില്‍
നമുക്ക് പ്രണയിക്കാം.

സുഹൃത്തിന്

പങ്കുവെക്കലിന്റെ
ശാസ്ത്രം
നാം
പഠിച്ചത്
ഹൃദയം
പകുത്തുകൊണ്ടല്ലോ.