ഓണ്‍ലൈന്‍ ഡിക്ഷനറി

പ്രണയം
തിരഞ്ഞപ്പോള്‍
കണ്ടത്
പണയവും
പരിണയവും
മാത്രം .

അമ്മ...

മറ്റൊരന്നനാളത്തിലൂടെ
നിറയുന്ന മനസ്സ് .


..

പ്രണയനഷ്ടം

എനിക്കുമുണ്ടായിരുന്നു ;
കാലാന്തരത്തില്‍
പേ പിടിച്ച
ഒരു വളര്‍ത്തുനായ .

ഒരു കുടം കള്ള്

അടിയില്‍ ;

ഉന്മാദ-
ദശയിലെപ്പോഴോ
ജീവന്‍ വെടിഞ്ഞ
ഒരു വണ്ട് .

മുകളില്‍ ;

പാതി വെളിവില്‍
മരണത്തിന്റെ
വ്യാസമളന്ന്‌
ഒരു ഉറുമ്പ് .

ഇടയില്‍ ;

നുരഞ്ഞ്‌
പതഞ്ഞ്
ഞാനും
നീയും .

തണല്‍

നിന്റെ കുപ്പായവും
നീ തന്ന നൂറു രൂപയും ;
ഒരു പേക്കിനാവിനു
ലെവി കൊടുക്കേണ്ട
നിന്റെ ദുര്യോഗം,
എന്റെ അന്നം.

മദ്യശാലയില്‍
നൂറു രൂപയ്ക്ക് ഞാന്‍
വിറ്റു തീരുമ്പോള്‍
ഓര്‍മ്മയുടെ ഭൂപടത്തിലെങ്ങും
നിന്റെ തണല്‍ .

ഇന്നലെയും കണങ്കാലില്‍
തെരുവു ശ്വാനന്റെ കൗതുകം.
ഇന്നലെയും കരിപടര്‍ന്ന
മിഴികളോട്
കടം പറഞ്ഞ കഷ്ടകാലം.

രാത്രിയുടെ ഗര്‍ഭപാത്രം
പകലിലേക്കെന്നെ
പടിയിറക്കുന്നു .
വീണ്ടും നിന്റെ കുപ്പായവും
വിയര്‍പ്പുണങ്ങാത്ത
നൂറു രൂപയും .
ഭൂപടത്തില്‍ തണല്‍ വളരുന്നു.


പിഴച്ച കിനാവിന്റെ തീരത്ത്;
കണ്ടാല്‍

തിരിച്ചെടുക്കാന്‍ മറക്കണ്ട ,

മെരുങ്ങാന്‍ മടിക്കുന്ന
നാറ്റത്തെ പൊതിഞ്ഞ
നിന്റെ കുപ്പായവും
നീ തന്ന നൂറു രൂപയും.